Սուրբ Հոգիին մասին հարազատ գիտութիւն ունենալը կարեւորագոյն սկզբնակէտ մը պիտի ըլլայ հաւատացեալին համար՝ իր առաքելութիւնը զօրութեամբ կատարելագործելու համար: Տէր Յիսուս Իր աշակերտները պատրաստեց, որպէսզի լաւապէս ճանչնան Սուրբ Հոգին եւ իրենց առաքելութիւնը սկսին Անոր հետ գործակցելով (տե՛ս Յհ 14--16):
Աստուածաշունչը կը յայտնէ, թէ Աստուած Իր գործերը սկսաւ Սուրբ Հոգիին միջոցաւ եւ միշտ Անոր միջոցաւ կը կատարէ զանոնք: Աստուածաշունչը կը յայտնէ նաեւ, թէ Աստուած ստեղծագործութիւնը ըրաւ Իր խօսքով եւ Սուրբ Հոգիին գործակցութեամբ (Ծն 1.2-3):
Աստուած երկիրը յանձնեց մարդոց պատասխանատուութեան (տե՛ս Սղ 115.16), եւ մարդոց հետ գործակցելով կը միջամտէ եւ Իր օգնութիւնն ու ծրագիրները կը հրամցնէ, որպէսզի մարդիկ երկիրը կառավարեն Աստուծոյ տեսակէտով:
Սուրբ Հոգին կը գործակցի այն մարդոց հետ, որոնք Քրիստոսով Աստուծոյ նպատակներուն համաձայն կ'ապրին երկրի վրայ:
Աստուածաշունչը կը յայտնէ, թէ Սուրբ Հոգին.
- Աստուած է (Գրծ 5.3-4):
- Հօր եւ Որդիին հաւասար է (Մտ 28.19-20):
- Յաւիտենական է (Եբր 9.14):
- Ամենակալ է (տե՛ս Ծն 1.2):
- Ամենագէտ է (Ա.Կր 2.10-11):
- Ամենուրեք է (Սղ 139.7):
- Աստուծոյ զօրութիւնն է (Մտ 12.28: Ղկ 11.20):
Առաւել, թէ.
- Քրիստոս Հոգիէն առաջնորդուած կատարեց Իր առաքելութիւնը (Ղկ 4.14):
- Քրիստոս Հոգիին զօրութեամբ կ'ընէր Իր հրաշքները (Մտ 12.28: Ղկ 5.17):
Սուրբ Հոգիին զօրութիւնը յայտնուած է.
- Ստեղծագործութեան մէջ (Ծն 1.2: Յոբ 26.13: Սղ 104.30)
- Քրիստոսի Սուրբ Հոգիով ծնելուն մէջ (Ղկ 1.35)
- Քրիստոսի մեռելներէն յարութիւն առնելուն մէջ (Ա.Պտ 3.18)
- Կեանք տալու մէջ (Եզ 37.11-14: Հռ 8.11)
- Հրաշագործելու մէջ (Հռ 15.18-19)
- Աւետարանը ազդու կերպով քարոզելու մէջ (Ա.Կր 2.4: Ա.Թս 1.5)
- Դժուարութիւններուն յաղթելու մէջ (Զք 4.6,7)
Սուրբ Հոգին ստանալու խոստումը ունինք.
- Հօրմէն (Ղկ 24.49)
- Որդիէն (Գրծ 1.8)
Աստուծոյ սուրբերը.
- Սուրբ Հոգիով կը դիմադրեն դժուարութիւնները եւ կը շարունակեն դէպի նպատակակէտ (կարդա՛ Սղ 51.12):
- Սուրբ Հոգիով կը զօրանան (Եփ 3.16):
- Ճշմարտութիւնը խօսելու մէջ համարձակ կ'ըլլան Սուրբ Հոգիով (Մք 3.8: Գրծ 4.31, 6.5,10: Բ.Տմ 1.7,8):
- Սուրբ Հոգիին օգնութիւնը կը ստանան տկարութեան մէջ (Հռ 8.26)
- Կ'ամրապնդուին յոյսով (Հռ 15.13):
Սուրբ Հոգին որակաւոր ծառայողներ կը պատրաստէ՝ աշխարհ ղրկելու համար (Գրծ 1.8):
Աստուծոյ Խօսքը Սուրբ Հոգիին սուրն է (Եփ 6.17):
Սուրբ Հոգիին Գործակցութիւնը
Սուրբ Հոգին կը գործէ Աստուծոյ Խօսքին համաձայն, եւ երբ Աստուծոյ Խօսքը սիրտիդ մէջ ունենալով խօսիս, Սուրբ Հոգին քեզի հետ կը գործակցի եւ դէմ կը դնէ թշնամիին.
- Սուրբ Հոգին թշնամիէն զօրեղ է (Ա.Յհ 4.4):
- Կը կանգնի թշնամիին դէմ (Ես 59.19):
- Տէր Յիսուս կը հաստատէ, թէ Սուրբ Հոգին Իրմով պիտի գործէ (Յհ 16.12-15):
- Խօսքիդ համաձայն կը գործէ ու կը փրկէ (Գրծ 10.44):
Սուրբ Հոգիին պատճառով, թշնամին չի կրնար ընդօրինակել քու ըրածներդ. Սուրբ Հոգին չի գործակցիր անոր հետ եւ ո՛չ ալ աչք կը խփէ:
- Սուրբ Հոգին կը վկայէ փրկագործութեան կողքին՝ խօսքով եւ գործով (Գրծ 5.32: Կարդա՛ Ելք 9.11):
- Կարմիր ծովը բաժնուեցաւ Աստուծոյ ժողովուրդին համար եւ ո՛չ Փարաւոնին զօրքերուն համար (Ելք 14.21-28: Եբր 11.29):
- Անոր գործակցութիւնը մեր ձեւով չ'ապահովուիր (Գրծ 19.13-19):
Մի՛ Սահմանափակեր Սուրբ Հոգիին Գործը
Երբ Սուրբ Հոգին յայտնէ մեզի առաքելութեան մասին, Իր խօսքին մէջ նկատի կ'ունենայ ամբողջ աշխարհը: Սակայն մենք յաճախ կը սահմանափակենք Անոր խօսքը, մեր համոզումներուն եւ նուիրումին չափին մէջ:
Եթէ Աստուծոյ անսահման ծրագիրը մեր սահմանափակ նայուածքով կամ մեր առաքելութեան ծաւալը մեր չափանիշներով որոշենք, շատ պզտիկ եւ անկատար առաքելութիւն մը կ'ունենանք, որուն համար կարելի է ըսել, թէ մարդկային է, որովհետեւ աստուածայինը կ'ըսէ.
«Գացէք ամբողջ աշխարհ եւ բոլոր մարդոց քարոզեցէք Աւետարանը» (Մր 16.15):